रसुवा— गोसाइँकुण्ड गाउँपालिका पाँचौँ पालिका अध्यक्ष खुल्ला पुरुष भलिबल प्रतियोगिताको उपाधि भिमलाल हिराचन स्मृति, सक्षम सोसाइटी नेपालले हात पारेको छ ।
शनिबार रसुवाको सदरमुकाम धुन्चेस्थित बालमन्दिर प्राङ्गणमा सम्पन्न फाइनल खेलमा सिमबन्दी युवा सोसाइटीलाई ३–१ को सेटले पराजित गर्दै भिमलाल हिराचन स्मृति, सक्षम सोसाइटी नेपाल च्याम्पियन बनेको हो ।
प्रतिस्पर्धात्मक बनेको खेलमा विजेता टोलीले २६–२४, २५–१७, १९–२५ र ३४–३२ को सेटमा जित निकाल्दै उपाधि आफ्नो पक्षमा पारेको थियो ।
उपाधिसँगै विजेता टोलीले नगद २ लाख ५० हजार रुपैयाँ, ट्रफी तथा मेडल प्राप्त गरेको गोसाइँकुण्ड गाउँपालिका अध्यक्ष कैसाङनुर्पु तामाङले जानकारी दिए ।
उपविजेता सिमबन्दी युवा सोसाइटीले नगद २ लाख रुपैयाँसहित मेडल प्राप्त गरेको छ । त्यस्तै, भिमली युवा क्लब तृतीय हुँदै १ लाख ५० हजार रुपैयाँ पुरस्कार जित्न सफल भएको छ ।
“रसुवागढी नाका, पूर्वाधार र शिक्षा, सुसंस्कृत र समृद्ध गोसाइँकुण्ड, लाङटाङ हाम्रो सदिच्छा” भन्ने नारासहित वैशाख ३० गतेदेखि सुरु भएको प्रतियोगिता जेठ २ गते सम्पन्न भएको हो । प्रतियोगितामा जिल्लाका १२ टोलीको सहभागिता रहेको आयोजकले जनाएको छ ।
सम्बन्धित खवर
